Культурнае супрацоўніцтва з Нідэрландамі наладжвае Лабжанскі школьны музей, што ў Клімавіцкім раёне. Багатай этнаграфічнай калекцыяй гісторыка-краязнаўчага музея «Гісторыя Лабжанскага краю», які размешчаны ў мясцовай школе, зацікавіўся гістарычны музей Амстэрдама.

Інтарэс дырэктара гэтай установы Б’ерна Стэнверса невыпадковы, бо невялічкі музей за некалькі гадоў свайго існавання назапасіў ужо каля 1500 ўнікальных экспанатаў багатай гісторыі Лабжанскага краю. За тры гады існавання педкалектыў навучальнага комплекса “Лабжанская сярэдняя школа – дзіцячы садок” разам з зацікаўленымі вучнямі зрабіў вялізарную этнаграфічную працу па павялічэнні фондаў музея. Дзякуючы руплівай пошукавай дзейнасці пад кіраўніцтвам настаўніцы гісторыіі Ірыны Навагродскай, у музеі ствараюцца такія экспазіцыі, як “Матчыны рукі”, “Гаспадарчы куток”, “Вывучэнне падузорніка”, “Куфар пасаг”, “Рамествы Лабжаншчыны” і “Рушнікі беларускія”. Менавіта багатая калекцыя традыцыйных рушнікоў, у якіх кожны даматканы сымбаль адлюстроўвае векавую крывічанскую мудрасць, суправаджаў беларуса, так бы мовіць, “ад світанку да змярканку”, выклікае цікавасць шматлікіх даследчыкаў і знаўцаў традыцыйнай культуры.

З нідэрландскімі навукоўцамі-этнографамі лабжанскія краязнаўцы ўжо дамовіліся развіваць культурныя адносіны. Зараз для сваіх калег з гэтай заходнееўрапейскай краіны ў музеі «Гісторыя Лабжанскага краю» рыхтуюць навуковы спіс сваей багатай калекцыі традыцыйных рушнікоў.

Дарэчы, Лабжанскі школьны музей Клімавіцкага раёна за 3 гады свайго існавання ўжо некалькі разоў станавіўся пераможцам раённага, абласнога і рэспубліканскага конкурсаў-аглядаў школьных этнаграфічных музеяў. А ўдзел у першым нацыянальным форуме “Музеі Беларусі”, які мінуў напярэдадні ў Гродне, дазволіў узняць работу музея на новы ўзровень.

«Радыё Магілёў»