Шасці аматарскім калектывам мастацкай творчасці Магілёўшчыны пастановай Міністэрства культуры Рэспублікі Беларусь ад 16 лістапада 2012 года №79 прысвоены найменні “народны” і “ўзорны”, у тым ліку двум калектывам, якія дзейнічаюць пры клубных установах культуры вобласці. Яны атрымалі ганаровыя найменні за дасягнутыя поспехі ў развіцці аматарскай мастацкай творчасці, адпаведны мастацкі ўзровень і творчыя паказчыкі, папулярызацыю нацыянальных культурных традыцый, актыўную канцэртную і выставачную дзейнасць.

Найменне “народны аматарскі калектыў” прысвоена:

- вакальнаму ансамблю “Бліскавіца” работнікаў жылкамунгаса маладзёжнага культурнага цэнтра “Юнацтва” аддзела культуры Касцюковіцкага райвыканкама;

- сямейна-родаснаму гурту “Радня” Муравільскага сельскага Дома культуры аддзела культуры Касцюковіцкага райвыканкама;

- вакальнаму ансамблю “Сустрэча” Магілёўскага гарадскога Дома настаўніка (з чэрвеня 2012 г. – дзяржаўная ўстанова дадатковай адукацыі “Цэнтр творчасці дзяцей і моладзі “Вдохновение” г. Магілёва”) .

Найменне “ўзорны аматарскі калектыў” прысвоена:

- студыі мадэлінгу “Стыль” дзяржаўнай установы адукацыі “Цэнтр дадатковай адукацыі дзяцей і моладзі “Росквіт” г. Бабруйска”;

- ансамблю народнай песні “Весялінка” філіяла дзіцячай школы мастацтваў аграгарадка Тупічына аддзела культуры Касцюковіцкага райвыканкама;

- вакальнаму ансамблю хлопчыкаў дзяржаўнай установы адукацыі “Магілёўская дзіцячая школа мастацтваў №3 імя М.М.Салдатава”.

На сённяшні дзень у Магілёўскай вобласці ганаровыя званні “народны”, “узорны”, “заслужаны” маюць 442 аматарскія калектывы мастацкай творчасці, з іх 227 дзейнічаюць пры клубных установах культуры.

Віншуем мастацкіх кіраўнікоў і ўдзельнікаў пералічаных творчых калектываў з атрыманнем высокіх званняў. Няхай гэта будзе добрым стымулам да новых творчых дасягненяў і здзяйсненняў, важнай прыступкай на шляху самаўдасканалення і творчага развіцця.

Вольга Семчанка, вядучы рэдактар Магілёўскага абласнога метадычнага цэнтра народнай творчасці і культурна-асветнай работы