У вёсцы Бабірова Глускага раёна на будынку, рэканструіраваным пад царкву, ўсталявалі купалы і крыжы, вырабленыя па спецыяльнаму заказу ў Валгадонску. Асвяціў крыжы і адслужыў вадасвятны малебен епіскап Бабруйскі і Быхаўскі Серафім.

“Вельмі сімвалічна, што купалы і крыжы на будучай царкве ўсталяваны менавіта ў Вялікую пятніцу, калі на крыжы быў распяты і прыняў смерць наш Гасподзь, — сказаў уладыка, звяртаючыся да сяльчан. — Мы павінны памятаць, што крыжовая смерць і Уваскрэсенне Хрыстова даюць нам надзею на жыццё вечнае з Богам. Няхай і ўстаноўленыя сёння крыжы дапамагаюць узняцца над будзённай мітуснёй, нагадваюць аб жыцці вечным”.

Рамонтныя работы на будынку царквы вядуцца ўжо амаль паўгода, іх арганізатарам і спонсарам выступіў ўраджэнец вёскі Бабірова Аляксандр Арцёмчык. Самі бабіраўчане таксама не застаюцца ў баку ад гэтай добрай справы — тыдзень назад вяскоўцы правялі калектыўныя работы па ўборцы прылеглай да царквы тэрыторыі. Праходзіць збор сродкаў на набыццё неабходных царкоўных рэчаў.

Па матэрыялах газеты “Радзіма”