Капсула часу будзе закладзена 29 ліпеня ў Магілёве на тэрыторыі замежнага таварыства з абмежаванай адказнасцю «Омск Карбон Магілёў».

У бліжэйшыя тры гады тут плануецца адкрыць новы завод па вытворчасці тэхнічнага вугляроду. Цырымонія, у якой прымуць удзел старшыня Магілёўскага абласнога выканаўчага камітэта Пётр Руднік і губернатар Омскай вобласці Віктар Назараў, азначае заканчэнне перадінвестыцыйнай фазы праекта і пачатак будаўнічых работ.

ЗТАА «Омск Карбон Магілёў», як удакладнілі ў камітэце эканомікі Магілёўскага аблвыканкама, створана ў 2012 годзе і зарэгістравана ў якасці рэзідэнта СЭЗ «Магілёў». Асноўны заснавальнік новай вытворчасці — ТАА «Омсктэхвуглярод», якое на працягу 70 гадоў займаецца вытворчасцю тэхнічнага вугляроду. «Омск Карбон Груп», куды ўваходзіць гэта прадпрыемства, — буйнейшы вытворца тэхнічнага вугляроду ў Расіі і краінах СНД. Магутнасць будучага магілёўскага прадпрыемства — 60 тысяч тон тэхнічнага вугляроду ў год, а яго галоўным спажыўцом стане ААТ «Белшына». Астатнюю частку плануецца адпраўляць на экспарт.

"Рэспубліка"