Сёлета галоўнае свята хлебаробаў праводзіцца ў новым фармаце. Абласныя дажынкі будуць адзначаць у Кіраўску 20 верасня. У Клічаўскім раёне святочныя мерапрыемствы адбудуцца 13 верасня ў агарагарадку Новыя Максімавічы. Жыхароў аграгарадка і ўдзельнікаў свята чакае шмат разнастайных і цікавых мерапрыемстваў.

Пачнуцца дажынкі ўрачыстым мерапрыемствам “Хвала рукам, што пахнуць хлебам” і ўшанаваннем хлебаробаў клічаўскага краю, якія вырасцілі небывалы ўраджай зерневых культур. Затым пераможцаў жніва і гасцей запросіць “Максімавіцкі кірмаш”. Аграпрамысловыя прадпрыемствы раёна сумесна з установамі культуры прымуць удзел у конкурсе на лепшае афармленне і прадстаўленне “Сельскай сядзібы”.

Шмат прыемных хвілін абяцае вялікі канцэрт лепшых творчых калектываў раёна і гасцей з Польшчы “Нізка кланяемся вам, хлебаробы ”. Упрыгожыць кірмаш фотавыстава “Асенні пейзаж ”. Усе жадаючыя змогуць прыняць удзел у конкурсах-выставах на самы прыгожы хлебны каравай, самае лепшае блюда з гародніны, самыя вялікія ці незвычайныя па форме і памерах плады, фрукты.

Мясцовыя пчаляры паспрачаюцца паміж сабой за званне “Мядовы кароль”, а маладыя сем’і высвятляць, хто з іх заслугоўвае звання “Уладар сяла ”. Да ўдзелу ў конкурсе “Іграй, гармонь! Звіні, частушка ” запрашаюцца аматары гэтага віду творчасці. Не менш цікавыя праграмы пройдуць на дзіцячай і спартыўнай пляцоўках максімавіцкага фестывалю-кірмашу.

«Сцяг Саветаў»