Прыцягненне інвестыцый, развіццё прамвытворчасці і інфраструктуры: Анатоль Ісачанка аб планах Магілёва на 2023 год

Прыцягненне інвестыцый, развіццё прамысловых вытворчасцей і рэалізацыя буйных інфраструктурных праектаў - на такіх задачах па развіццю горада Магілёва акцэнтаваў увагу старшыня Магілёўскага аблвыканкама Анатоль Ісачанка падчас сходу прадстаўнікоў працоўных калектываў па выніках сацыяльна-эканамічнага развіцця абласнога цэнтра за 2022 год.

«У 2022 годзе Магілёвам выкананы два з трох ключавых паказчыкаў: рост заработнай платы склаў 113%, паступленне сукупных даходаў у бюджэт 119,4%, - сказаў ён. - Абласны цэнтр па-ранейшаму гуляе ключавую ролю ў эканоміцы рэгіёну. Прадпрыемствы і арганізацыі горада фарміруюць больш за 45% абласных аб'ёмаў прамысловасці, 44% - раздробнага таваразвароту, 42% - фонду аплаты працы».

Па словах губернатара, рухаючай сілай развіцця горада выступае прамысловы комплекс. «Стабільна высокія вынікі паказваюць «Магілёўліфтмаш», «Стужка», «Зеніт» ды іншыя. Для далейшага развіцця прамысловасці горада важна рэалізаваць пачатыя праекты на прадпрыемствах «Магілёўліфтмаш», «Ольса», «Магілёўхімвалакно», - падкрэсліў ён. - Бягучы год стане ключавым у рэалізацыі дарожнай карты па развіццю пляцоўкі «Строммашына» з улікам працы з БелАЗ. Неабходна актыўна пачаць задзейнічанне вызваленай тэрыторыі. Нягледзячы на тое, што названае прадпрыемства знаходзіцца ў рэспубліканскай уласнасці, мера адказнасці кіраўніцтва гарвыканкама высокая. Пры гэтым мадэрнізацыя вытворчасці на нашых флагманах недастатковая».

Для паспяховага развіцця горада неабходны новыя і прарыўныя праекты, якія закрануць розныя сферы, аднак пакуль гэта задача не выконваецца ў поўным аб'ёме. «Па выніках 2022 года тэмп інвестыцый у асноўны капітал склаў 86,9% пры заданні 104%. Прычыны тут розныя: ад негатыўнага ўплыву вонкавых фактараў да банальных недапрацовак на пэўных участках. Пры роўных умовах адны аператыўна знаходзяць альтэрнатыўных пастаўшчыкоў абсталявання і выбудоўваюць лагістыку па яго дастаўцы, не спыняючы рэалізацыю праектаў, іншыя - чагосьці чакаюць. Я не выпадкова, усюды, дзе выступаю перад такімі калектывамі, завастраю ўвагу на інвестыцыях. Таму што інвестыцыі сёння - гэта эканоміка заўтра, якая вядзе да развіцця сацыяльнай сферы. Нам трэба больш і больш актыўна працаваць у гэтым напрамку. Не можа быць руху наперад, развіцця, без уліванняў. Не важна: вонкавыя гэта ўліванні ці ўнутраныя. Галоўнае, каб грошы накіроўваліся ў вытворчасць, у эканоміку. Тады яны дадуць аддачу», - адзначыў Анатоль Ісачанка.

У бягучым годзе ў абласным цэнтры працягнецца рэалізацыя буйных інфраструктурных праектаў і будуць пачаты новыя. Гэта будуць значныя праекты ў сферы медыцыны, адукацыі, рамонту вулічна-дарожнай сеткі, добраўпарадкавання дваравых тэрыторый і шмат іншага. «Неабходныя сродкі на гэта прадугледжаны. Наша з вамі задача - своечасова асвоіць выдзелены рэсурс. Дарэчы, гораду на гэтыя мэты плануецца выдзеліць каля Br200 млн, што ў разы больш за мінулы год, - падкрэсліў губернатар. - Па просьбе магіляўчан працягнецца рэалізацыя канцэпцыі па развіцці парка Падміколле, прыступім да добраўпарадкавання Грабянёўскага вадасховішча, пачнем будаўніцтва музея Воінскай славы Магілёўскай вобласці, які размесціцца ў раёне мемарыяльнага комплексу «Буйніцкае поле» і стане знакавым для рэгіёна аб'ектам».

Агульная мэта рэалізацыі ўсіх гэтых праектаў, паводле слоў губернатара, застаецца нязменнай - забяспечыць развіццё абласнога цэнтра, павысіць камфорт жыцця і дабрабыт гараджан.

БЕЛТА