Торфапрадпрыемства «Дняпроўскае» плануе павялічыць аб’ём вытворчасці на больш чым 10%

Аб’ём вытворчасці торфапрадпрыемства «Дняпроўскае» плануецца павялічыць на больш чым 10% да 2025 года. Пра гэта расказаў міністр энергетыкі Віктар Каранкевіч па выніках наведвання прадпрыемства сумесна са старшынёй Магілёўскага аблвыканкама Анатолем Ісачанкам, паведамілі ў прэс-службе Мінэнерга.

Праведзеная на «Дняпроўскай» мадэрнізацыя асноўных вытворчых фондаў і рэканструкцыя брыкетнага цэха дазволілі павялічыць аб’ёмы вытворчасці паліўных брыкетаў з 52 тыс. т у 2020 годзе да 71 тыс. т у 2021 годзе. Акрамя гэтага, умовы працы для персаналу значна палепшыліся. «У межах далейшай стратэгіі развіцця прадпрыемства да канца пяцігодкі неабходна нарасціць аб’ёмы вытворчасці да 79 тыс. т», – адзначыў Віктар Каранкевіч.

Паводле яго слоў, ключавой задачай для завода з’яўляецца ўмацаванне сыравіннай базы. «Арганізавана работа па будаўніцтве каля 100 га тарфяных палёў. Гэта дадатковы рэсурс для здабычы торфу. Да 2025 года плануецца забяспечыць будаўніцтва яшчэ каля 160 га», – дадаў міністр.

Анатоль Ісачанка расказаў, што прадпрыемства працуе стабільна, вытворчасць прадукцыі расце і заработная плата павялічваецца. «Завод выйшаў на планавыя лічбы па вытворчых паказчыках, але ёсць яшчэ магчымасць для нарошчвання патэнцыялу», – сказаў ён.

Абнаўленне асноўных вытворчых фондаў тарфяных заводаў ажыццяўляецца ў межах праграмы комплекснай мадэрнізацыі тарфяных вытворчасцей на 2021–2025 гады. Усяго за пяцігодку ў межах праграмы ў краіне плануецца здабыць каля 11 млн. т торфу, з якога будзе выраблена 6,5 млн. т прадукцыі. Прадугледжваецца будаўніцтва 3,7 тыс. га новых тарфяных палёў.

БЕЛТА, фота Мінэнерга