У Магілёўскай вобласці ў спісе перспектыўных – больш за 80 інвестпраектаў

Інвестар выбірае глыбінку

У самыя кароткія тэрміны запусціць новы інвестыцыйны цыкл з акцэнтам на рэгіёны – такую задачу паставіў Прэзідэнт у Пасланні беларускаму народу і Нацыянальнаму сходу. Нягледзячы на пандэмію і санкцыі, у 2021 годзе ў Магілёўскай вобласці ў асноўны капітал прываблена 2,2 мільярда рублёў інвестыцый – па тэмпе росту другое месца ў рэспубліцы. Пры рэалізацыі інвестдагавораў былі створаны амаль дзве з паловай тысячы новых рабочых месцаў.

Паўднёва-Усходняя СЭЗ

Першая пяцігодка інвестдагавора Крычаўскага прыватнага прадпрыемства ТАА «КМБ-Усход» хутка заканчваецца. Новы інвестпраект ацэньваецца амаль у 9 мільёнаў рублёў. Гаворка ідзе аб мадэрнізацыі вытворчасці – неабходнай умове канкурэнтаздольнасці. Прадпрыемства арэндуе стары цэх «Крычаўцэментнашыфера». Вытворчыя памяшканні вызваліліся пасля таго, як цэмзавод запусціў новую вытворчасць. Дырэктар «КМБ-Усход» Станіслаў Сівакоў тлумачыць, у чым перавагі развіцця бізнесу на паўднёвым усходзе Магілёўшчыны:

– Ільготы і прэферэнцыі, гарантаваныя ўказам Прэзідэнта «Аб мерах па развіцці паўднёва-ўсходняга рэгіёна Магілёўскай вобласці», супастаўныя з умовамі працы ў свабоднай эканамічнай зоне.

Сыравіну купляем на цэмзаводзе – за мінулы год 50 тысяч тон. Па сутнасці, развіваем узаемавыгадныя кааперацыйныя сувязі. На сённяшні дзень у нас працуюць 133 чалавекі, сярэдняя зарплата перавышае тысячу рублёў. Хочам выкупіць арандаванае памяшканне, а яно знаходзіцца ва ўласнасці Мінбудархітэктуры. Але мы бачым зацікаўленасць раённых і абласных уладаў у вырашэнні гэтага пытання.

Інвестыцыі пойдуць на абнаўленне станкоў – ім ужо больш за паўстагоддзя, а таксама на будаўніцтва цэха афарбоўкі. Плюс новыя рабочыя месцы, яшчэ больш падатковых паступленняў у бюджэт і магчымасць выходзіць на новыя рынкі збыту. Зараз амаль 30 працэнтаў прадукцыі ідзе на экспарт.

Станіслаў Сівакоў прыводзіць словы Прэзідэнта аб тым, што стандарт якасці жыцця павінен паляпшацца ў райцэнтрах і маленькіх пасёлках за кошт стварэння прадпрыемстваў на 100–150 працоўных месцаў:

– Гэта прагучала не як пажаданне, а як задача мясцовых органаў улады і ўраду. Толькі тады можна ўтрымаць кадры на перыферыі і гаварыць пра моцныя рэгіёны. У нас жа па тым жа ўказе і людзі могуць скарыстацца льготамі на будаўніцтва жылля. Будаўнічы бум, дарэчы, нашаму прадпрыемству толькі на руку.

У трэндзе – дрэваапрацоўка і аграбізнес

Начальнік упраўлення інвестыцыйнай і інавацыйнай дзейнасці камітэта эканомікі Магілёўскага аблвыканкама Дзмітрый Клімянкоў адзначае асаблівасці інвестпраектаў у топ-лісце рэгіёна:

– Трэць паказана з паметкай «імпартазамяшчальны». У трэндзе – дрэваапрацоўка, сельская гаспадарка. Калі фарміруецца праграма развіцця рэгіёна на пяцігодку, мы робім упор на вытворчыя аб’екты. Інвестыцыйны атлас для інвестара напярэдадні распрацавала магілёўскае Агенцтва рэгіянальнага развіцця. Сумесна з раённымі ўладамі выбралі каля 80 найбольш перспектыўных інвестпрапаноў.

У найбліжэйшай пяцігодцы сярод інвестпляцовак – буйныя прамысловыя прадпрыемствы. У малых населеных пунктах інвестпраекты носяць горадаўтваральны характар.

Да прыкладу, новае прадпрыемства «Чырвоны харчавік – Слаўгарад» прадугледжвае стварэнне ста працоўных месцаў. У Бялыніцкім раёне з’явілася аграпрадпрыемства па вытворчасці збожжа і дацкай беконнай свініны – 60 працоўных месцаў. У Быхаве інвестар «Энергалестэхкомплекс» будуе электрастанцыю на аднаўляльных крыніцах энергіі: кошт праекта – звыш 136 мільёнаў рублёў, плануецца стварэнне больш за 100 працоўных месцаў.

Ініцыятыва вітаецца

Пакуль яшчэ незвычайны для нашых шырот бізнес маюць намер развіваць у Магілёўскім раёне. У чыстым полі спачатку выраслі велізарныя ветракі, а цяпер у планах кампаніі «Нотоз-Інвест» майнінг. Дырэктар Андрэй Застрэлаў тлумачыць, чаму для вытворчасці крыптавалюты ключавы фактар – кошт электраэнергіі:

– Абсталяванне для майнінга – кантэйнернага тыпу, і ўстанавіць яго можна нават на вуліцы. Але ў залежнасці ад магутнасці яно можа спажываць электраэнергію як адзін, а то і як дзясятак заводаў. Таму пляцоўка паблізу ветракоў – ідэальная лакацыя для такога бізнесу. Да таго ж, кіраўніком дзяржавы падтрымліваецца перспектыўнасць развіцця майнінгу ў краіне, бо дзякуючы Беларускай АЭС мы атрымалі танную электрычнасць. Нашай пляцоўкай ужо цікавіліся інвестары з Кітая і Казахстана.

Андрэю Застрэлаву 30 гадоў, у яго дзве вышэйшыя адукацыі і свой погляд на бізнес-стратэгію:

– Мы прадаём электрычнасць, але значна большы эканамічны эфект можна атрымаць, калі вырабляць тавар з гэтай энергіі з дабаўленым коштам. Дзяржава стварае ўмовы, але сітуацыя на рынку мяняецца. І паспяховасць бізнесу залежыць ад таго, як прадпрымальнік паспявае рэагаваць на гэтыя перамены.

СКАЗАНА

– Пераадоленне міжрэгіянальных адрозненняў застанецца прыярытэтам дзяржпалітыкі. А для гэтага трэба больш актыўна ствараць стымулы, каб людзі імкнуліся жыць на ўсёй тэрыторыі, а не толькі ў Мінску.

Аляксандр Лукашэнка ў Пасланні беларускаму народу і Нацыянальнаму сходу, 28 студзеня 2022 года.

СБ