Заняцца вытворчасцю гафрыраванага кардону плануе ТАА «ВМГ Індустры»

Заняцца вытворчасцю гафрыраванага кардона плануе ТАА «ВМГ Індустры». Пра гэта на інвестфоруме «Млын поспеху», які прайшоў у Магілёве, паведаміў дырэктар ТАА «ВМГ Індустры груп» Аляксей Якаўлеў.

Кампанія па безадходнай перапрацоўцы драўніны ТАА «ВМГ Індустры груп» падпісала на пляцоўцы форума пагадненне аб удасканаленні працэсу вытворчасці мэблі на тэрыторыі ў СЭЗ «Магілёў». Аляксей Якаўлеў у сваім выступленні нагадаў гісторыю стварэння прадпрыемства, якое зараз з’яўляецца прыкладам паспяховага развіцця бізнесу на тэрыторыі Магілёўскай вобласці.

«Сёння «ВМГ Індустры» ў Беларусі – вядомы брэнд, які асацыіруецца з якасцю, адказнасцю і ўменнем трымаць слова. У Магілёве гэта найбуйнейшае мэблевае прадпрыемства, на якім працуе амаль дзве тысячы чалавек. На пачатковым этапе на прадпрыемстве працавала шмат замежнікаў, зараз – толькі мясцовыя спецыялісты. Штомесячны аб’ём выпускаемай прадукцыі – больш за 10 мільёнаў еўра. Уся яна рэалізуецца за межамі краіны – кампанія больш за 20 гадоў у партнёрстве з сусветна вядомай кампаніяй «Ікеа».

«ВМГ Індустры» не аднойчы ўдастойвалася тытула «Найлепшы экспарцёр Рэспублікі Беларусь». Кожны месяц у казну прадпрыемства адлічвае больш за 3 мільёны рублёў. Больш за 20 мільёнаў еўра – штогадовы яе прыбытак», – падзяліўся вынікамі дзейнасці Аляксей Якаўлеў.

Паводле яго слоў, прадпрыемства «ВМГ Індустры» ў Магілёве за ўвесь перыяд сваёй дзейнасці не налічвала дывідэндаў акцыянерам, а накіроўвала іх на развіццё. У выніку пасля адкрыцця прадпрыемства ў Магілёве было створана яшчэ адно ў Барысаве, якое таксама дынамічна развіваецца – у яго ўжо ўкладзена больш за 55 мільёнаў еўра інвестыцый. «Гэтыя прыклады прадэманстравалі, што супрацоўніцтва з буйным сусветным іграком можа прыносіць мноства новых магчымасцей. На нашым прадпрыемстве ўкаранёны самыя высокія і сучасныя патрабаванні, узятыя з «Ікеа». Маглі б прайсці дзесяцігоддзі, каб сфарміраваць такую высокую прафесійную і вытворчую культуру, якую маем сёння. Немагчыма пераацаніць важнасць гэтага для паспяховай працы», – адзначыў Аляксей Якаўлеў. 

Паводле яго слоў, адкрытасць, сумленнае і законнае вядзенне бізнесу, абарона здароўя і бяспека супрацоўнікаў, садзейнічанне навучанню супрацоўнікаў і іх дзяцей, беражлівае і руплівае стаўленне да рэсурсаў, магчымасць іх другаснага выкарыстання – гэтыя прынцыпы ляжаць у аснове карпаратыўнай культуры «ВМГ Індустры» і з’яўляюцца падмуркам паспяховага развіцця.

Прыкладам яго стала прадстаўленне на пляцоўцы форума двух праектаў кампаніі, якія плануюцца да рэалізацыі ўжо ў самай найбліжэйшай перспектыве. Адзін з іх прапануе вытворчасць гафрыраванага кардона-імпартазамяшчальнага асартыменту, запатрабаванага на ўнутраным рынку ў вялікіх аб’ёмах. А зыходнай сыравінай для яго стануць нізкагатунковыя лісцяныя пароды драўніны, якія ў лішку маюцца ў краіне.

Другі праект – стварэнне канструкцый з драўніны для буйнапанэльнага вышыннага домабудавання.

mogilevnews.by