Праваслаўныя вернікі сёння адзначаюць адно з вялікіх свят - Дабравешчанне Прасвятой Багародзіцы.
Гэта свята ўсталявана ў памяць аб дні, калі Дзеве Марыі з'явіўся пасланы Богам Арханёл Гаўрыіл і абвясціў: «Не бойся, Марыя, бо ты здабыла ласку ў Бога. Ты народзіш Сына і дасі імя яму Ісус. Ён будзе вялікі і назавецца Сынам Усявышняга, і Валадарству ягонаму не будзе канца». Лічыцца, што менавіта ў гэты дзень на Марыю сышоў Дух Святы і яна зачала Богадзіцятка Ісуса.
Дабравешчанне штогод адзначаецца 7 красавіка (па новым стылі), роўна за дзевяць месяцаў да Нараджэння Хрыстовага, якое прыпадае на 7 студзеня. З даўніх часоў свята з'яўляецца адным з найважнейшых і ўшанаваных у праваслаўі. На Русі верылі, што ў гэты дзень нават грэшнікаў не мучаць у пекле. Выконваць якую-небудзь працу строга забаранялася.
Свята настолькі шануемае, што калі яно здараецца ў Вялікі пост, то пост паслабляецца, а калі ў Вялікдзень, то святкуецца адначасова з Уваскрэсеннем Хрыстовым. У гэты дзень праводзіцца ўрачыстая літургія Іаана Залатавуста, якая папярэднічаецца ўсяночнай службай. Пасля службы асвячаюцца хлеб і соль.
Паводле народных павер'яў, Дабравешчанне азначае прыход вясны, калі сам Гасподзь дабраслаўляе зямлю на сеянне, урадлівасць, гэта значыць на дабрабыт чалавечае. У гэты дзень выпякалі прасфоры, у якія ўкладвалася капейка (на шчасце). Акрамя таго, прасфоры клалі альбо ў насенне, альбо закопвалі па кутах палёў, абараняючы такім чынам будучы ўраджай. Паводле павер'я, якое надвор'е на Дабравешчанне - такое яно будзе і на Вялікдзень.
БЕЛТА
