Праваслаўныя вернікі святкуюць Вадохрышча

Праваслаўныя вернікі сёння святкуюць Вадохрышча Гасподняе (Богаяўленне) - адно з вялікіх непераходных двунадзесятых свят. Яно устаноўлена ў памяць аб хрышчэнні Ісуса Хрыста ў рацэ Іардан.

З Евангелля вядома, што Ян Хрысціцель, заклікаючы народ да пакаяння, хрысціў людзей у водах Іардана. Ісус Хрыстос прыйшоў да Іаана, каб хрысціцца, аднак той, лічачы сябе нявартым праводзіць абрад над Збавіцелем, стаў утрымліваць яго, кажучы: «Мне трэба хрысціцца ад Цябе і ці Ты прыходзіш да мяне?» Але Ісус адказаў яму, што так трэба здзейсніцца праўдзе. Тады Ян падпарадкаваўся і хрысціў Ісуса.

Вядома, што пры хрышчэнні Збавіцеля Бог явіў сябе свету ў трох асобах свайго Бажаства: Бог Сын - Ісус Хрыстос прымаў хрышчэнне ў Іардане, Дух Святы сышоў на яго ў выглядзе голуба, Бог Айцец засведчыў Ісуса Хрыста голасам з неба «гэты ёсць Сын Мой умілаваны, у якім Маё ўпадабанне». Таму Вадохрышча па-іншаму называюць Богаяўленнем.

Свята пачынаецца яшчэ вечарам 18 студзеня, калі ўсе праваслаўныя адзначаюць Вадохрышчанскую куццю, падчас якой, пасля літургіі ў храмах, здзяйсняецца асвячэнне вады. Другі раз вада асвячаецца ў само свята Богаяўлення. Людзі вераць, што ў гэты час вада набывае гаючыя ўласцівасці і захоўвае іх на працягу года. Яе даюць піць цяжкахворым, ёю асвячаюць храмы і дамы.

Да нашых дзён захавалася традыцыя акунацца на Вадохрышча ў палонку. Лічыцца, што падчас абраду ў вадзе, якая з'яўляецца крыніцай новага жыцця, чалавек памірае для граху і ўваскрасае для Бога.

БЕЛТА