На яравой сяўбе задзейнічана шэсць энерганасычаных трактароў. Адзіным тандэмам у майстэрнях і на полі працуюць браты Дзмітрый і Алег Нікіценка з аграгарадка Верамейкі. Больш за тое, у гаспадарцы заняты і іх сярэдні брат Аляксандр - работнік кормаскладу. Сям'я Нікіценка - жывое ўвасабленне цеснай сувязі ўсіх напрамкаў работы сельгаспрадпрыемства: правільна падрыхтуеш тэхніку, якасна і аператыўна ўзарэш, з запасам нарыхтуеш корму - добрую аддачу атрымаеш ад жывёлагадоўлі.
Малодшы з трох братоў Нікіценка стаў галоўным інжынерам у гаспадарцы, яго старэйшы брат Алег - адзін з самых дасведчаных механізатараў. Сустракаемся ў поле, якое Алег Юр'евіч на энерганасычаным трактары «Беларус-3522» рыхтуе пад сяўбу кукурузы.
- Тэхнікі дастаткова. Практычна ўся - беларускай вытворчасці, толькі адзін камбайн замежны. Сёлета ўжо атрымалі новы МТЗ-3522, яшчэ два - у 2022-м, - падкрэслівае Дзмітрый Юр'евіч.
Не магу не пацікавіцца меркаваннем практыкаў аб словах Прэзідэнта, сказаных на нарадзе аб развіцці сяла і павышэнні эфектыўнасці аграрнай галіны: «Калі хтосьці з губернатараў разлічвае закрыць свае патрэбы імпартнай тэхнікай, то ад гэтых фантазій рэкамендую адмовіцца. Ад слова «зусім». Нядаўна гэта мы дэталёва абмяркоўвалі на нарадзе па прамысловасьці. І не трэба казаць, што імпартнае лепшае, чым нашае. Асабліва сёння».
Старэйшы брат пацвярджае словы Кіраўніка дзяржавы прыкладам са сваёй практыкі:
- Я на гэтым трактары працую ўжо 16 гадоў і з усімі задачамі спраўляюся, - кажа Алег. - Тут галоўнае - працаваць ад цёмнага да цёмнага, тады і вынік будзе.
Згаджаецца і Дзмітрый, разважаючы са сваёй «інжынернай» званіцы:
- Трактары працуюць эфектыўна, выконваюць свае функцыі, у выпадку непрадбачаных абставін звяртаемся ў сэрвісныя цэнтры і нам аператыўна дапамагаюць. Айчынныя трактары і камбайны зарэкамендавалі сябе са станоўчага боку, якасць задавальняе. Важна, што, нягледзячы на санкцыі, уласная вытворчасць у краіне забяспечвае ўсе гаспадаркі агрэгатамі, мы не губляем працоўныя месцы.
Галоўны клопат інжынернай службы - мінімізаваць паломкі тэхнікі, і асноўны ўпор - на яе падрыхтоўку яшчэ да пачатку вяснова-палявой кампаніі. У той жа час трактары для розных відаў работ выкарыстоўваюць розныя, бо на некаторых дробнаконтурных палях менш габарытныя сельгасмашыны больш эфектыўна. Так што і «МТЗ-1221» пакуль рана спісваць з рахункаў, дапаўняе галоўны інжынер.
- Да меркавання старэйшага брата прыслухваюся, - адзначае Дзмітрый Юр'евіч. — У той жа час павышаю кваліфікацыю, вучуся на трэцім курсе Беларускай сельскагаспадарчай акадэміі ў Горках, дзе выкладчыкі дзеляцца сваім досведам. Сёння ж сапраўды трэба ўмець працаваць у любых атмасферных умовах, каб не спісваць свае недапрацоўкі на надвор'е, як сказаў Прэзідэнт. А гэта немагчыма без засваення новых тэхналогій.
Разам з тым на Чэрыкаўшчыне ў цэлым умовы надвор'я склаліся нядрэнна.
- Добрая вясна, - усміхаецца дырэктар КСУП «Агракомплекс «Светлы» Ірына Борахава. - Раннія яравыя збожжавыя і зернебабовыя, без уліку кукурузы, грэчкі, пасеялі ў належныя тэрміны. Амаль стопрацэнтная гатоўнасць тэхнікі была ўжо ў лютым. Рамонт яшчэ дзвюх адзінак завяршаем, але яны не ўдзельнічаюць у вяснова-палявых працах.
Гаспадарка лідзіруе ў раёне на сяўбе: каля 70 працэнтаў ад плана на раніцу 17 красавіка. Галоўны спецыяліст аддзела інтэнсіфікацыі і вытворчасці ўпраўлення па сельскай гаспадарцы і харчаванні Чэрыкаўскага райвыканкама Юрый Осіпаў адзначае, што яшчэ ў панядзелак усе сельгаспрадпрыемствы завяршылі сяўбу ранніх яравых збожжавых культур, выканаўшы план у 3580. Падыходзіць чарга кукурузы, пад якую адвялі каля трох тысяч гектараў, і грэчкі, яе трэба пасеяць звыш 300 гектараў. У аўторак пачалі сяўбу яравога рапсу: запланавана 490 гектараў. Аператыўна вядуць і іншыя палявыя работы.
Пры выкарыстанні матэрыялаў актыўная гіперспасылка на mogilev-region.gov.by абавязковая
